Aktakuzë e rëndë ndaj Fatmir Shehollit: Prokuroria e akuzon për spiunazh për BIA-n dhe shantazh mbi 13 mijë euro
Prishtinë – Prokuroria Speciale e Republikës së Kosovës ka ngritur aktakuzë ndaj Fatmir Shehollit, duke e ngarkuar me dy vepra penale: “Spiunazh” dhe “Shantazh”.
Sipas aktakuzës, Sheholli dyshohet se për një periudhë kohore, deri më 9 tetor 2025, ka vepruar si person i rekrutuar nga Shërbimi Informativ i Serbisë – BIA, duke zbatuar urdhra dhe detyra të zyrtarëve të këtij shërbimi.
Prokuroria pretendon se ai ka mbledhur, siguruar dhe përcjellë përmes komunikimeve telefonike të dhëna, informacione dhe dokumente që lidhen me aktivitetet politike, gjendjen e sigurisë dhe funksionimin e institucioneve të Republikës së Kosovës.
Ky është një element që ishte përmendur edhe në dosjen e mëhershme të Prokurorisë, sipas së cilës Sheholli dyshohej se kishte mbledhur informacione për prona, aktivitete biznesore dhe funksionimin e institucioneve në Kosovë dhe se i kishte përcjellë ato përmes komunikimeve telefonike.
Akuzë edhe për shantazh mbi 13 mijë euro
Përveç spiunazhit, Prokuroria e ngarkon Shehollin edhe me veprën penale “Shantazh”.
Sipas aktakuzës, nga viti 2022 deri në dhjetor 2025, ai dyshohet se ka shantazhuar një person me inicialet A.J., duke e detyruar të veprojë në dëm të pasurisë së tij, në një shumë që tejkalon 13 mijë euro.
Sipas pretendimit të organit të akuzës, Sheholli i ka kërkuar të dëmtuarit para në emër të huazimit, ndërsa dyshohet se e ka kërcënuar se, në rast se nuk ia jepte paratë, do të publikonte në media video-incizime dhe informacione që, sipas aktakuzës, do t’ia dëmtonin rëndë nderin, reputacionin dhe autoritetin.
Pra, aktakuza e re e vendos Shehollin përballë dyshimeve për dy vepra të ndryshme penale: njëra që lidhet me sigurinë shtetërore dhe shërbimin informativ serb BIA, ndërsa tjetra me shantazh dhe përfitim financiar.
Fatmir Sheholli ishte arrestuar më 9 tetor 2025 nën dyshimet për spiunazh dhe që nga atëherë është mbajtur në paraburgim. Gjykata e Prishtinës ia ka vazhduar disa herë masën e paraburgimit; në korrik 2026, masa iu vazhdua edhe për dy muaj.
Çështja penale tashmë i është dërguar për shqyrtim Gjykatës Themelore në Prishtinë, ndërsa Sheholli vazhdon të jetë nën masën e paraburgimit.
Duhet theksuar se bëhet fjalë për pretendime të Prokurorisë të paraqitura në aktakuzë dhe jo për një vendim përfundimtar të gjykatës.
